Nagsabat na si Koronadal City Mayor Ogena may kaangtanan sa nangin concern ni City Traffic Management Officer head Roel Bagunoc angot sa indi suno pa pag-aksyon sang iya talatapan sa iya ginsumiter nga investigative report.
Madumdoman nga nagpaguwa sang hibubun-ot si Bagunoc bangud sa suno pa inaction sang City Government angot sa mga anomalya kag problema nga nagakatalatabo sa iya talatapan, partikularmente ang isyu sang pagpangotong partikularmente sa iya gin-relieve nga deputy operations officer nga si Perlie Tolentino.
Ginpaathag ni Mayor Ogena nga gin-refer na niya ini sa legal department kag nagahulat na lamang siya sang mangin desisyon sini.
Magluwas sini, ginpaathag man sang alkalde nga kasubong kay Bagunoc, committed man siya sa iya ginapatuman nga 10-point development agenda, makaligad ginpamangkot sang City Traffic head ang alkalde sa iya dedikasyon sa iya mismo nga mga tinutuyo para sa siyudad.
Kaangot sini, natalana nga magasulat sang memorandum si Ogena kay Bagunoc agud pormal ini nga imbitahon sa iya talatapan kag didto istoryahan ang concern sang opisyal bangud para sa iya, indi husto nga forum ang radyo agud ibuyagyag ang iya mga reklamo kag dapat personal sila nga mag-istoryahanay.
Samtang ginkondenar man ni Mayor Ogena ang natabo nga pagpamomba sa Brgy. Kalawag 3 sa Isulan, Sultan Kudarat nga nagbilin sang 8 ka tawo nga pilason.
Kaangot sini, magapatigayon suno pa siya sang pagsinapol kay Koronadal PNP chief of police PLt. Col. Joefel Siason kaupod ang iban nga police officials agud maistoryahan ang mga security measures kasunod sang natabo nga pagpamomba sa nasambit nga banwa.
Panawagan man sang alkalde sa tanan nga magbantay sa palibot bangud ginahimo man nila ang ila mga obra agud mapabilin nga luwas ang Koronadal batok sa mga malain nga mga elemento.
