KORONADAL CITY – Gin-ako sa karon sang Bureau of Internal Revenue ukon BIR nga may yara sang kawad-an sa tax information dissemination ilabi na sa pagremit sang withholding tax ang halos tanan nga mga barangay sa South Cotabato.
Ini ang ginkumpirmar ni Noel Gonzales, Revenue District Officer sang BIR District 111 sa esklusibo nga interbyu sang Bombo Radyo Koronadal.
Suno kay Gonzales, kinahanglan ang pagpatigayon sang dialogue kauopod ang mga Brgy Captains kag Brgy Treausurers sa bug-os nga probinsya agud nga mahibaluan sang mga ini ang ila nga obligasyon ilabi na sa pagbayad sang buhis.
Ini bangud madamo suno pa sa mga barangay sa South Cotabato ang wala makaremit sang ila nga with holding tax halin sa mga proyekto nga ila nga ginapatuman sa ila nga lugar.
Pagpa-athag ni Gonzales nga may yara sang memorandum ang Department of Budget and Management nga dapat magkadto ang 20% sang ERA sang barangay sa mga development projects kag ang nasambit nga mga proyekto ang may yara sang buhis.
Sa tion suno pa makaremit sang withholding tax ang isa ka barangay, personal nga magabayad sang penalidad ang Brgy Kapitan kag ang Brgy Treasurer.
Kaangot sini, may yara sang ginapatigayon nga dialogue ang BIR sa kada banwa agud nga mahatagan sang briefing ang mga opisyales sa ila obligasyon.
