KORONADAL CITY – Mangin istrikto ang Cotabato City LGU sa pagdisiplina sa mga kabataan nga naulamid sa mga gang kag nagapabaya sa ila mga pagtuon.
Ini ang ginpasiguro ni Anecito Rasalan, executive secretary ni Cotabato city mayor Cynthia Guiani-Sayadi sa nangin interbyu sang Bombo Radyo Koronadal.
Nangin problema sa nasambit nga siyudad ang nagadata nga mga grupo sang mga kabataan nga nagaintra sa gang kag wala na sang labot sa ila pagtuon.
Suno kay Rasalan, gin-istorya na ni Mayor Sayadi ang mga ginikanan kag mismo nga mga bata nila kag ginpaandaman nga mahimo ma-expel ang mga ini sa katapusan sang school year kun wala sa gihapon sila nagbag-o.
Ginsermonan naman sang alkalde ang mga ginikanan bangud sa ila pagpatumbaya sa ila mga bata.
Magluwas diri, ginkalbo man suno pa ang mga juvenile delinquents bilang marka nga nag-intra sila sadto sa mga gang kag pagabantayan sang local government unit ng Cotabato.
Yara sa 30 kabataan nga miyembro sang nagkalain-lain nga gang ang nagpromisa kay Mayor Sayadi nga indi na sila magaliwat sa pag-intra sa anuman nga grupo ukon gang.
