KORONADAL CITY – Ginpahayag sang mga pumuluyo sa Brgy. Paraiso syudad sang Koronadal nga naga istar malapit sa Sanitary Land Fill nga indi na nila magwantahan ang kadamo sang langaw sa ila lugar.
Magluwas pa dire indi man nila maagwantahan ang truck sang basura partikular na sa isa ka dako nga mall sa siyudad nga nagahaboy sang ila mga basura sa SLF nga kasubong nagatulo pa kag nagatuga sang kalain nga baho.
Nagpagwa man sang hibubun-ot ang mga pumuluyo nga wala suno pa ginasapak ang ila reklamo rason nga magapalab-ot nalang sila sang ila problema s 8888.
Apang gin insister naman ni Koronadal City Environment Officer Agustus Bretaña nga nagahimo sila sang tikang agud nga mahatagan sang solusyon ang problema sang mga reklamante.
Ginpaathag sang opisyal nga nagasunod suno pa sila sa regulasyon sang ideal nga sanitary land fill nga indi maapektuhan ang palibot.
Kadugang sini ginaawhay sang City government ang mga pumuluyo sang siyudad nga kinahanglan lamang sang mitigation kag kooperasyon.
Nahibaluan nga personal nga ginbisita ni Mayor Eliordo Ogena ang SLF sang nagligad nga adlaw agud makit-an ang sitwasyon sini kag mabatian man ang reklamo sang mga pumuluyo.
