KORONADAL CITY– Ginaistoryahan sa subong ang hinali nga pagpanaog sa pwesto sang duha ka mga opisyal sang Datu Unsay, Maguindanao nga sanday Mayor Fuentes Dukay kag Vice Mayor Wanay Salibo Dukay.
Nahibaluan nga ginsumiter sang alkalde kag bise alkalde sang Datu Unsay ang ila resignation kay Maguindanao Governor Bai Mariam Sangki Mangudadatu sa wala pa mahibaluan nga rason.
Bangud sa pagpanaog sa pwesto sang duha, nagpungko nga alkalde sang Datu Unsay si Datu Andal “Datu Aguak” Ampatuan V makaligad nga magpanumpa kay Sen. Nancy Binay.
Samtang magapungko naman bilang bise alkalde ang konsehal man nga si Bai Janine Ampatuan Mamalapat.
Ginkumpirmar man ini sang Ministry of the Interior and Local Government sang Bangsamoro Autonomous Region in Muslim Mindanao paagi kay Atty. Naguib Sinarimbo.
Nahibaluan nga ang pagpungko ni Datu Aguak kag Bai Janine bilang alkalde kag bise alkalde ang base sa rule of automatic succession sa idalom sang Local Government Code of 1991.
Si Datu Aguak ang bata ni Datu Andal Ampatuan Jr. nga amuh ang nagapanguna nga suspek sa Maguindanao massacre.
