KORONADAL CITY– Ginpasakaan na sang kaso ang suspek sa pagpanglabo sa duha ka mag utod sa Brgy. New Isabela Tacurong City makaligad maarestar sang mga otoridad.
Suno sa Tacurong City PNP ginkilala ang suspek sa pagpanglabo nga si Marlo Alibio Lajo, 36 anyos , single kag isa ka driver nga anay man nga karelasyon sa ila magulang nga babaye.
Nahibaluan nga personal nga kaakig suno pa ang nagtulod sa suspek agud nga labuon sini ang mag utod nga biktima nga sanday Jeth Gose Badajos, estudyante kag Kent Gose Badajos nga isa ka mekaniko kag residente sang nasambit nga barangay.
Sa karon isa sa mga anggulo nga ginalantaw amuh ang indi pag ugyon sang mga biktima sa nangin relasyon sadto sang suspek kag sang ila magulang nga babaye.
Sa karon nagapaayo na ang mga biktima sa balay bululngan samtang yara naman sa lockup cell sang Tacurong ang suspek.
Nagapadayon naman ang imbestigasyon sang mga otoridad sa nasambit nga insidente.
