KORONADAL CITY- Mas ginpahugtan pa sa karon ang seguridad sa mga detachments sang Citizen Arm Force Geographical Unit ukon Cafgu sa banwa sang Arakan, North Cotabato.
Ini ang kasunod sang nagluntad suno pa nga pag-atake sang rebelde nga New People’s Army sa isa ka CAFGU detachment sa Sitio Katindo, Barangay Malibatuan sa nasambit nga banwa.
Kaangot sini, ginpahayag ni Police Captain Jose Mari Molina, hepe sang Arakan PNP nga wala sang napagkit nga pilason sa mga miyembro sang CAFGU nga nakastandy sa nasambit nga detachment.
Ginkumpirmar man sang opisyal nga nakabalik na sa ila tagsa-tagsa ka puluy-an ang mga residente sa lugar makaligad nga nagbakwit bangud sa kahadlok nga maulamid sa kinagamo.
Samtang, posible suno pa nga diversionary attack lang sang kontra ang nasambit nga pag-atake rason nga mas ginpahugtan man sang PNP ang tanan nga entry kag exit points sa banwa.
Sa karon, padayon pa nga ginahibalo sang PNP kag AFP kun may mga casualties sa bahin sang NPA kag kun ano nga mga armas ang gin-usar sang mga ini sa nasambit nga pag-atake.
