KORONADAL CITY– Yara na sa kustodiya sang mga otoridad ang masobra 50 ka loosefirearms kag eksplosibo nga boluntaryo nga ginsungka sang mga residente halin sa 27 ka barangay sa banwa sang Palimbang, Sultan Kudarat.
Sandig sa report, ginpangunahan ang nasambit nga turnover ceremony sang mga opisyal sang LGU Palimbang nga ginalakipan nanday Palimbang Mayor Ramon Abalos, ABC Pres Norhato Sanday kag ni 1st Mechanized Infantry Brigade Commander Lt. Col Efren Baluyot.
Kaangot sini, kabug-usan nga 55 mga armas kag 11 ka granada ang ginturn-over sang mga residente bilang pagpakita sang suporta sa militar kadungan naman sang ginapatuman nga Martial Law sa Mindanao kag Election Gun ban.
Nahibaluan nga ang banwa sang Palimbang ang isa sa mga ginatutukan sang AFP bangud sa mga asod-asod nga insidente sang patyanay.
Sa karon, padayon sa gihapon ang pagpakig-angot sang militar sa mga local officials agud tigayon na nga makumbinsir ang mga nagapanago sang indi lisensyado nga armas kag eksplosibo nga isungka na ang mga ini.
