KORONADAL CITY – Ginsira kag ginadilian anay sa mga turista ang pagpadulong sa 7 falls nga kilala nga tourist destination sa banwa sang Lake Sebu, South Cotabato matapos ang natabo nga pagkahulog kag pagkapatay sang isa ka Romanian national sa falls no.2 sa nasambit nga banwa.
Sa interbyu sang Bombo Radyo Koronadal kay Mayor Antonio Fungan, temporaryo nga ginmandu sang provincial government sang South Cotabato ang pagdumili sa mga turista sa lugar agud nga masiguro ang kaluwasan sang mga ini kag agud mas mahapos ang ginahimo nga retrieval operation sa bangkay sang turista nga si Itrika Paul Brato.
Kaina pasado alas-10 sang aga lamang narekober ang bangkay sang turist sa falls no. 7 makaligad ang ginpatigayon nga pagpangita sang mga otoridad humalin pa sang Sabado.
Suno kay Mayor Fungan, antes pa man ang insidente, ginhana pa sang mga pulis nga punggan ang turista nga maglumpat sa falls. No. 2 apang napaslawan ang mga ini.
Sa subong, nakig-angot na sa pamilya sang biktima ang mga otoridad agud nga mapahibalo sa ila ang natabo sa iya kag agud makuha ang bangkay sini.
Nahibaluan nga una nga narekober ang wallet sang biktima rason nga gilayon natumod nga isa ini ka Romanian national.
Naguwa man sa imbestigasyon sang mga otoridad nga nagaisahanon lamang nga nagpadulong sa Lake Sebu ang biktima nagikan sa banwa sang Surallah.
