KORONADAL CITY- Malipayon nga ginbalita ni 33rd Infantry Battalion commanding officer Lt. Col. Harold Cabunoc nga nadugangan pa ang numero sang mga myembro sang New People’s Army nga nagsungka sa militar.
Kadungan sang selebrasyon sang Independence Day sa pungsod subong nga adlaw, nagsungka ang 6 ka myembro sang NPA gikan sa banwa sang Esperanza, Sultan Kudarat nga ginalakipan sang isa ka lide kag lima ka mga myembro nga ginalakipan sang isa ka 15 anyos nga child warrior.
Sa interbyu sang Bombo Radyo Koronadal kay Col. Cabunoc, isa ka maayo nga senyales ini nga amat-amat nga nagamuklat ang mga rebelde sa kamatuora nga wala sang maayo nga matuga ang pakipagbakbakan nila sa hubon sang gobyerno kag pagpatigayon sang kalakasan sa ila nga kasubong nga Pinoy.
Sa subong yara na sa kustodiya sang militar ang panibag-o nga 6 ka mga rebelde nga nagsungka kag natalana nga iaatubang Sultan Kudarat Governor Pax Mangudadatu.
Dugang pa ni Col. Cabunoc una na nga ginkalipay ni Pres. Rodrigo Duterte sa iya nga pagbisita sa Sultan Kudarat ang mas nagadamo nga myembro sang mga rebelde nga ginasungka ang ila armas agud magbalik sa normal nga pangabuhi.
