KORONADAL CITY – Yara na sa kustodiya subong sang Department of Social Welfare and Development (DSWD) ang lima ka menor de edad nga nadakpan sa pagpangawat sang mga gamit sang mga atleta sa nagapadayon nga Socsksargen Regional Athletic (SRAA) Meet.
Suno kay PSI Rafael Banggay Jr., officer in-charge sang Tampakan PNP, nadakpan nila ang lima ka menor de edad nga responsable sa pagpangawat sang mga sapatos kag ila nga mga gamit sang mga atleta gikan sa Sarangani Province sa ila nga billeting quarters sa Tampakan National Highschool.
Matapos nga mareport ang nagtabo nga pagpangawat sa kapulisan, nagresulta ini sa pagdakop sang mga estudyante sa Barangay Poblacion.
Nahibaluan nga nagpakuno-kuno nga mga atleta ang lima ka mag-abyan nga lunsay mga estudyante sang Tampakan National Highschool agud nga makasulod sa nasambit nga buluthuan.
Didto na nila nakuha ang nasambit nga mga gamit sang mga atleta kasubong sang mga bayo, sapatos kag iban pa.
Naghingyo naman sang pasaylo ang hepe sang Tampakan PNP sa delegasyon sang Sarangani Province bangud sa kahuy-an nga natuga sang mga ini.
Nagpasalamat naman ang mga atleta kag narekober pa ang tanan nga mga ginkawat nga gamit sang mga ini.
Bwas, magatakop na ang SRAA 2018 kun sa diin,ang South Cotabato ang host subong nga tuig.
