KORONADAL CITY- Naarestar ang 4 ka mga wala pa ginhingadlan nga mga miyembro sang Bangsamoro Islamic Freedom Fighters sa Brgy. Lumabao, General Salipada K Pendatun sa ginpatigayon nga pursuit operation sa probinsya sang Maguindanao.
Sa interbyu sang Bombo Radyo Koronadal kay PSSupt. James Gulmatico hepe sang Criminal Investigation and Detection Group- ARMM , ang nasambit nga operasyon ang ginpatigayon sang gintingob nga pwersa sang CIDG-ARMM, 33rd Infantry Battalion kag 4th Special Action Battalion batuk sa Bangsamoro Islamic Freedom Fighters o BIFF.
Nahibaluan nga target sang operasyon ang kuta sang terorista nga grupo nga ginapamunuan ni Datu Parido Balabagan alyas kumander Banog sang nasambit nga banwa kun sa diin ini nagapatigayon sang pagtililipon para sa plano nga pagsalakay sa banwa sang Lambayong, Sultan Kudarat.
Sa nasambit nga operasyon, nakapalagyo si kumander Banog apang nahimo naman nga maarestar ang 4 sini ka mga kaupdanan kag narekober ang 2 M14 rifles, 2 RPG launchers kag 3 granada.
