KORONADAL CITY- Nagapadayon sa subong ang imbestigasyon sang Koronadal City PNP sa ginapatihan nga paglupok sang bomba sa kilid san entrance sang Christ the King Cathedral sa Rizal St. siyudad sang Koronadal.
Sa ekslusibo nga interbyu sang Bombo Radyo Koronadal kay Mik Mik Madel isa ka flower vendor, nakibot na lamang sila sang makabati sang mabaskog nga paglupok sa entrance sang simbahan kun diin gilayon sila nga nagdinalagan palayo sa ginluntaran sang insidente.
Suno naman kay Alvin Mendoza, guwardya nagtuga ini sang panic sa mga tawo sa palibot labi na ang mga tawo nga nakapwesto malapit sa kilid nga entrance sang simbahan kun diin madamo nga mga traysikel ang nakapark.
Sa interbyu sang Bombo Radyo Koronadal kay Brgy. Zone III kapitan Bert Hinay 3 ang napagkit nga pilason nga yara na sa South Cotabato Provincial Hospital kag padayon nga ginabulong.
Nahibaluan nga maya yara sang bunyag sa sulod sang simbahan sang naglupok ang ginapatihan nga bomba.
Gilayon naman nga nagresponder ang explosive ordnance disposal team sang PNP kag ginkordon ang area kun diin sa subong nagapadayon ang imbestigasyon.
