KORONADAL CITY– Yara na sa kustodiya sang mga otoridad ang tatlo katawo nga ginakabig mga bigtime drug pushers makaligad nga maarestar sa ginpatigayon nga buybust operation sa Malvar St., Brgy Poblacion, Tacurong City.
Sa impormasyon nga ginpalab-ot ni Bombo Correspondent Arnel Palada, ginkilala ang mga suspek nga sanday Roderick Lamban Pigampuan, 37-anyos, residente sang Talisayan, Zamboanga City, isa ka Felix Abarquez, 21-anyos, driver kag residente sang Kibawe, Bukidnon.
Arestado man si LJ Albaña Dadoli, 29-anyos single, cook kag residente sang Malvar St, Tacurong City.
Narekober sa posisyon sang mga ini ang yara sa 8 sachet sang ginapatihan nga shabu kag marked money nga P500.00.
Samtang, aminado naman ang mga suspek nga nagagamit sila sang iligal nga druga apang hugot nga ginpanginwala sang mga ini nga ginapanag-iyahan nila ang nasmabit nga shabu kundi ginhatag lamang sa ila agud nga ipanagtag sa mga customers.
Nagpamalibad man ang mga ini nga ipahibalo ang identity sang mga drug lords.
Ginabulubanta nga yara sa P23,000 ang kantidad sang mga nakumpiskar nga mga suspected shabu.
Sa subong, natalana nga pasakaan sang kaso nga paglapas sa RA 9165 ukon Comprehensive Dangerous Drugs Act of 2002 ang nasambit nga mga drug pushers.
