KORONADAL CITY – Arestado ang 2 ka mga kalalakihan samtang 3 naman ang nakapalagyo kaupod na ang isa kababye sa ginpatigayon sang mobile patrolling sang mga otoridad alas-2:50 kagaina sang kaagahon sa Koronadal Central Elementary School 1, Alunan Avenue Cor. Rizal Street, Barangay Zone 4, Koronadal City.
Ginkilala ang mga natikma nga suspek nga sanday Noel Pacardo Paras, 22-anyos, wala sang asawa, mangunguma samtang natikma naman ang kaupod sini nga si Reynaldo Dela Cruz Hipolito, 29-anyos, wala asawa, mangunguma kag pareho nga residente sang Barangay Malaya, Banga, South Cotabato.
Nakuha ang isa ka homemade cal. 9mm kay Paras samtang isa naman ka kutsilyo ang nakuha kay Hipolito nga may kalabaon nga 9 inches.
Nahibaloan nga nagatambay sa gilid sang dalan ang mga suspek sang maagyan ini sang mga otoridad.
Nagpalagyo naman ang 3 pa ka mga kaupdanan sang mga nadakpan nga suspek sang makita nga nanaog sa patrol ang mga kapulisan sang Koronadal City PNP.
Sa interbyu sang Bombo Radyo sa isa ka suspek kay Hipolito, ginpahayag sini nga indi niya nahibaloan nga bawal ang pagdala sang armas luthang kag kutsilyo.
Nahibaloan man nga yara sa idalum sang impluwesiya sang makahulogbon nga ilimnon sang matikma ini sang mga otoridad.
