Nagalab-ot sa 10 ka indibidwal ang napatay kag 64 pa ang napilasan matapos ang makusog nga pagsabog sang mga fireworks sa isa ka religious festival sa Mexico.
Nagluntad ang insidente malapit sa Santa María Canchesdá samtang nagahiwat ang pagselebrar sang simbahan para sa kapistahan sang Our Lady of Light.
Base sa inisyal nga impormasyon, naglupok ang mga fireworks nga ginatago sa lugar malapit sa simbahan.
Bangud sa mabaskog nga pagsigabong, naguba ang isa ka bahin sang simbahan kag may pila ka tawo nga naipit sa sulod sang istraktura.
Gilayon naman nga nagpatigayon sang rescue operation ang mga otoridad kag emergency responders agud maluwas ang mga tawo nga naipit kag mabuligan ang mga napilasan.
Gindala man sa mga balay bululngan ang mga biktima nga nagkinahanglan sang medikal nga pag-atipan.
Lakip sa mga napilasan ang duha ka pari kag pila ka kabataan nga nagtambong sa nasambit nga pagselebrar.
Padayon naman ang imbestigasyon sang mga otoridad agud mahibaluan kun ano ang nagtuga sang paglupok kag kun paano nakalab-ot ang mga paputok sa amo nga lugar.Ginatan-aw man sang mga imbestigador ang mga posible nga paglapas sa safety protocols nga mahimo nga nagresulta sa nasambit nga insidente.
