KORONADAL CITY – Wala na sang kabuhi sang masapwan sang mga otoridad ang isa ka lalaki sa kapinyahan nga sakop sang Field 109A Londres, Barangay Cannery Site, Polomolok, South Cotabato.
Ginkilala ang biktima nga si Rosevelt Sivillino Ballacar, 29 anyos, isa ka welder kag residente sang Purok Candelaria, Poblacion, Tupi, South Cotabato.
Nasapwan ang biktima 10 kilometro lamang ang kalayuon sa Polomolok Police Station.
May igo sang madamo nga buno sa nagkalain-lain nga bahin sang iya lawas ang biktima nga amo ang gintunaan sang kamatayon sini.
Narekober ang gingamit nga kitchen knife halos 180 metros lamang gikan sa bangkay sang biktima.
Kalakip sa nakuha sa crime scene ang mga gamit sini kag cellular phone.
Sa karon, yara na sa isa ka punerarya anng bangkay sang biktima kag natalana nga ipaidalom sa Post Mortem Examination.
Nagapadayon naman ang imbestigasyon sang mga otoridad sa natabo agud makilala ang suspek kag mahibaluan ang motibo sang krimen.
