Ginkumpirmar ni US President Donald Trump nga 19% na lang ang tariff nga igapatong sa mga produkto nagikan sa Pilipinas, halin sa 20%.
Ini natabo pagkatapos sang iya pagpakigsapol kay President Ferdinand Marcos Jr.
Suno kay Trump, may open market sa US nga wala tariff sa pila ka produkto, pareho sang mga automobile.
Ginpahayag naman ni Marcos nga ini para lang sa pila ka produkto, pareho sang salakyan.
Nahibaluan nga may 30% nga tariff ang Pilipinas sa 10-seater nga salakyan, kag 20% sa mga bus kag trucks.
Ang 19% nga tariff amo ang ikaduha nga pinaka-nubo sa Southeast Asia, pagkatapos sang Singapore nga may 10%.
Nagapati si Marcos nga bisan isa ka porsyento lang nga kabuhin, daku na nga achievement tungod sang espesyal nga relasyon sang Pilipinas kag US.
Nagpasugot man ang Pilipinas nga magbakal sang mas madamo nga produkto halin sa US, pareho sang soy, wheat, kag mga bulong.
Ginlaragway naman ni Trump si PBBM bilang mabaskog nga negotiator kag ginrespeto niya siya.
Ginpasiguro nila ang maayo nga relasyon sang duha ka pungsod kag ang padayon nga pag-isturyahan sang mga tariff.
