KORONADAL CITY – Tuman nga depresyon ang ginapatihan nga anggulo nga ginalantaw sang Polomolok PNP kaangot sa pagpatay sang isa ka amay sa iya bata antes ini naghikog.
Una nga ginkilala ang mga biktima nga sanday Mark Jonath Panadero, 29 anyos kag ang bata sini nga si Chester Ericson Panadero, lunsay mga residente sang Prk. 2 Brgy. Lamcaliaf Polomolok, South Cotabato.
Sa interbyu sang Bombo Radyo Koronadal kay PSupt. Jose Marie Simangan, hepe sang Polomolok PNP, nakaangkon sang indi paghangpanay si Mark Jonath kag ang iya live in partner, rason nga naghalin ang babaye kag nagpadulong sa Manila.
Wala man ini naga-contact sa iya, kag nakit-an pa ni Mark sa Facebook post sini nga may iban na ini nga kaupod nga lalaki nga amo ang nagtulod sa iya sa tuman nga estado sang depresyon.
Nasapwan sang mga kaingod ang mag-amay nga wala na sang kabuhi kag may higot sa ila mga liog takna alas 9 sang aga kun sa diin sa pagpati sang kapulisan ala-1 sang kaagahon nagluntad ang insidente.
Indi man suno pa magapatigayon sang imbestigasyon ang pamilya sang mga biktima bangud wala sang may nakit-an nga foul play sa nasambit nga insidente.
