Nagtambong sa funeral prayer ang tatlo ka bata sang napatay nga anay Iranian leader nga si Ayatollah Ali Khamenei, samtang linibo ka tawo kag matataas nga opisyal ang nag-upod sa funeral ceremony sa Tehran, Iran.
Lakip sa nagtambong sanday Mostafa, Meysam, kag Masoud Khamenei, nga nakita nga nagapangamuyo sa atubangan sang lungon sang ila amay. Wala naman nagtambong ang isa pa niya ka bata nga si Mojtaba Khamenei, nga ginakabig nga posible nga masunod nga Supreme Leader sang Iran.
Madumduman nga napatay si Ayatollah Ali Khamenei kag pila ka miyembro sang iya pamilya matapos ang gin-alegar nga pambomba sang Estados Unidos kag Israel sang Pebrero 28, nga nagresulta sa pila ka semana nga inaway sa rehiyon antes ang temporaryo nga ceasefire.
Lakip man sa seremonya ang mga lungon sang iya bata nga babaye, umagad, kag isa ka 14-ka-bulan nga apo. Nagtambong man sanday Iranian President Masoud Pezeshkian kag Parliament Speaker Mohammad Baqer Qalibaf.
Samtang, wala pa gihapon nagpakita sa publiko si Mojtaba Khamenei, nga gin-ulat nga napilasan sa nasambit nga pag-atake. Wala pa sang opisyal nga kumpirmasyon gikan sa Iran parte sa iya kondisyon.
