KORONADAL CITY – Nagalaum ang Department of Education Region 12 nga malabawan sang Soccsksargen Warriors Athletes ang ila nga performance sang nagligad nga tuig sa Palarong Pambansa 2024 nga ipatigayon sa Cebu City sa palaabuton nga Hulyo 6 tubtob 17 sini nga tuig.
Ini ang ginpahayag ni Magdaleno “Jojo” Duhilag, Regional Sports Coordinator sa interview sang Bombo Radyo Koronadal.
Suno kay Duhilag, humalin nga natapos ang Soccsksargen Regional Athletic Association Meet (SRAA) nagpaidalom na gilayon sa rigid training ang mga athletes.
Pila sa mga events nga ginalauman makakuha sang bulawan nga medalya ang Region 12 amo ang table tennis, badminton, athletics, arnis, sepak takraw kag iban pa nga hinampang bangud sa preparasyon nga ginhimo sang mmga athletes.
Ginapasiguro man ni Duhilag sa mga ginikanan sang mga athletes nga mangin safe ang mga ini kag igahatag ang nagakaigo nga panginahanglanon sa ila pagpadulong sa Cebu City.
