Ginpahayag sang “Megastar” nga si Sharon Cuneta nga bag-o lang siya nagpa-agi sang medical procedure sa iya spine sa Singapore matapos makabatyag sang mabaskog nga kasakit sulod sang halos duha ka tuig.
Sa isa ka Instagram post sang Marso 12, ginbahagi sang beteranong singer-actress nga ang iya pagpakadto sa Singapore amo tungod sa medical nga rason.
Suno sa iya, dugay na siya nga nagapa-agi sang pain management tungod sa kasakit sang iya tuo nga balakang kag bitiis.
Dugang pa niya, nagpakita man ang mga pagsusuri nga may problema man ang iya liog nga kinahanglan tambalan, gani kinahanglan niya nga magbalik sa Singapore sa masunod nga mga bulan.
Nagpangayo man sang pasensya si Sharon sa iya mga tagasuporta kag mga kaupdanan sa trabaho tungod wala siya nakatambong sa finals sang iya entertainment show, kun sa diin isa siya sa mga hurado.
Bag-o lang man nga ginpalab-ot si Sharon sang isyu matapos niya ipakita ang iya senior citizen ID, kun sa diin ginpahayag niya nga ang pagtigulang isa ka “privilege.”
Ginpahibalo man sang Megastar nga plano niya nga siya mismo ang magdumala sang iya career paagi sa bag-o nga management company nga ilalunsar niya subong nga tuig.
