Ginumpisahan na ni Pope Leo XIV ang iya opisyal nga pagbisita sa pungsod Spain, kun sa diin ginalauman nga talakayon niya ang mga pagahambalan may kaugnayan sa kalinong, migrasyon, kag reporma sa sulod sang Simbahang Katolika.
Sa iya speech sa sa atubangan nanday King Felipe VI kag Queen Letizia sa Royal Palace sa Madrid, gindayaw sang Santo Papa ang gobyerno sang Spain bangud sa pagpauntat sini sa mga kinagamo sa padayon nga pagsuporta sa mga migrante nga nagapangita sang mas luwas kag maayo nga kabuhi.
Suno sa Santo Papa, nangin importante nga halimbawa ang Spain sa pagduso sang kalinong, paghiliusa, kag pagrespeto sa dignidad sang kada indibidwal sa pihak sang nagkalin-lain nga hangkat nga ginaatubang sang kalibutan sa kasamtangan.
Sa sulod sang pito ka adlaw nga pagbisita, nakatalana man nga makigpulong si Pope Leo XIV sa mga biktima sang sexual abuse sa sulod sang Simbahang Katolika bilang kabahin sang padayon nga pagpatinguha sang Simbahan nga hatagan pagtagad ang mga isyu nga ginaatubang sini kag magahatag sang suporta sa mga biktima.
Pagabisitahon man sang Santo Papa ang pila ka komunidad sang mga migrante nga nagaistar sa Spain agud personal nga makita ang ila kahimtangan kag mabatian ang ila mga eksperyensya.
