KORONADAL CITY- Ginhimo na nga morgue para sa mga napatay nga biktima sang coronavirus disease ang isa sa mga pinakadako nga ice skating stadium sa Madrid, Spain nga isa sa mga pungsod nga tuman nga nahalitan sang nasambit nga balatian.
Ini ang ginpahayag ni Leonides Labja, isa ka chef nga nagaobra sa isa ka restaurant sa nasambit nga siyudad sa ekslusibo nga interbyu sang Bombo Radyo Koronadal.
Suno kay Labja nga tumandok sang Cebu City, bangud sa kadamuon sang mga napatay bangud sa nasambit nga virus kag indi na masarangan sang mga funeral parlors, nadesisyonan sang Spanish government nga himoon nga morgue ang Palacio de Hielo ukon Ice Palace nga pagabutangan sang mga bangkay agud mapreserba anay antes i-cremate.
Kasubong sa iban nga pungsod nga ginahalitan sang covid-19, hugot man nga ginapatuman ang total lockdown agud malikawan ang paglapta sang virus.
Magamulta naman sang 600 euro kag pagkakakulong ang sin-oman nga magabayolar sa mga protocol nga ginapatuman sang mga otoridad.
