Pila ka mga manunudlo buwis-buhay gintabok ang baha sa isa ka sapa sa Sarangani

Buwis-buhay ang eksena sang pila ka mga manunudlo sang ila atubangon ang makusog nga baha sa isa ka sapa sa Sitio Banlas, Barangay Kihan, Malapatan, Sarangani mga pasado alas-3 sang hapon sang Huwebes.

Ginhimo nila ini agud makapauli sa ila tagsa ka panimalay.

Suno sa uploader nga si Teacher Jailene Tusan, pauli na sila halin sa Akbual Elementary School sa Barangay Upper Suyan, kag pag-abot nila sa nasambit nga lugar, mataas na ang baha sa sapa.

Tungod nga wala sang taytay sa amo nga bahin, may pila ka residente nga boluntaryo nga nagbulig sa ila agud makalampuwas.

Dugang pa ni Teacher Tusan, dugay na nga wala sang taytay sa amo nga sapa, gani kon may baha, napilitan sila nga magpangrisko agud lang makatabok kag makapauli.