PARANG, MAGUINDANAO DEL NORTE – Naglab-ot sa masobra 14.6 milyon nga kantidad sang smuggled nga sigarilyo ang nakumpiska sang mga otoridad sa ginpatigayon nga entrapment operation sa Parang, Maguindanao del Norte.
Suno kay PLt.Col. Erwin Tabora, hepe sang Parang PNP, paagi sa ginpabaskog nila nga intel monitoring, natukiban ang pagsulod sang isa ka delivery van sa banwa sang Parang nga may karga nga karton-karton nga mga sigarilyo nga nagikan sa Indonesia.
Gani gilayon sila nga nagpatigayon sang check point sa Barangay Sarmiento sa nasambit nga banwa kag gin-flagdown ang isa ka van-type truck nga may karga sang halos 500 ka karton sang smuggled nga sigarilyo nga nagakantidad sang Php14,677,500.
Ginpahayag ni Tabora nga ang pagkakumpiska sang mga kargamento ang namonitor paagi sa tip sang mga pumuluyo.
Dugang pa sang opisyal nga gintinguhaan pa sang mga smugglers nga taguon ang kinarton nga sigarilyo paagi sa pagtabon sang sinako-sako nga kargamento.
Ang mga nakumpiska nga smuggled nga sigarilyo ang ginalakipan sang Harvy kag GreenHill.
Nagapatigayon na sang maid-id nga imbestigasyon ang mga otoridad sa nagapanag-iya sang nasambit nga kargamento agud nga mapahamtangan sang penalidad.
Magapangatubang naman sang kaso nga paglapas sa Section 1113(a) of Republic Act 10863, otherwise known as the “Customs Modernization and Tariff Act (CMTA) of 2016, in relation to Section 117 and the Tobacco Exportation and Importation Rules and Regulations, ang tatlo ka mga smugglers nga naaresto sang kapulisan.
