KORONADAL CITY – Ginakabig nga isa ka diversionary tactics sang rebelde nga grupo nga Bangsamoro Islamic Freedom Fighter (BIFF) ang nagluntad nga pagpasigabog sang isa ka Improvised Explosive Device (IED) sa kilid sang national highway sa Sitio Pansol Barangay Macasampen Guindulungan Maguindanao.
Ini ang ginpahayag ni Lt.Col John Paul Baldomar, tigpamaba sang 6th Infantry Division,Philippine Army sa eksklusibo nga interbyu sang Bombo Radyo Koronadal.
Suno kay Lt.Col. Baldomar, signature IED sang BIFF ang nagsigabong sa nasambit nga lugar sang Domingo kun diin target ang nag-agi nga military truck sakay ang mga suldalo.
Bangud sa kabaskog sang pagsigabong nawasak ang wind shield sang sasakyan sang militar apang masuwerte nga wala naman sang may napilasan sa mga katapu sang 549 Army Engineering Brigade nga nag-agi sa Cotabato Isulan highway samtang nagdulot naman sang kahadlok sa mga residente sa nasambit nga lugar.
Dugang pa ni Baldomar, nakapagkit na sang 6 ka mga IED explosions sa sulod lamang sang 6 ka adlaw ang militar sa probinsya sang Maguindao kun diin 2 ka mga miyembro sang Civilian Armed Forces Geographical Unit (CAFGU) ang napilasan, 4 ka sibilyan kag 5 ka mga suldado ang napatay.
Kadungan sini hugot nga ginkundenar sang mga opisyal sang Bangsamoro Autonomous Region of Muslim in Mindanao (BARMM) kag pila ka Civil Society ang kalakasan nga dala sang BIFF sa pag-obserbar sang Holy Month of Ramadan kag isa ka sahi sang pagpangbastos ang ginahimo sang mga ini.
