KORONADAL CITY– Nag-apela sang bulig kay Pangulong Rodrigo Duterte ang pamilya sang isa ka Overseas Filipino Worker (OFW) sa General Santos City makaligad nga malakip ini sa napahamtangan sang penalidad nga bitay sa United Arab Emirates (UAE).
Ginkilala ang OFW kay Jennifer Dalquez, 29 sang Barangay Labangal sang nasambit nga siyudad kun diin ginpahayag sang iloy sini nga si Rajima Dalquez nga ginahulat nila ang mangin desisyon sang korte sa Sabado, Pebrero 11, 2017.
Pagasetensiyahan suno pa sang kamatayan ang Pinay Domestic Helper (DH) matapos nga napatay sini sa buno ang iya employer sang Disyembre 7, 2014.
Sa ginpatigayon nga trial sa kaso sang Pinay DH, ginpahayag sini nga ang pagpatay sa iya nga Emirati employer ang kabahin lamang sang self-defense bangud luyag siya sini nga luguson.
