KORONADAL CITY – Wala nagakadula sang paglaum ang pamilya ni Bombo Bart Maravilla nga maangkon nila ang hustisya sa idalom sang Duterte administration.
Sa ekslusibo nga interbyu sang Bombo Radyo Koronadal kay Jansen Maravilla, bata ni Bombo Bart, wala sila nagasungka sa ila ginapakigbato agud mahatagan sang katarungan ang kamatayon sang ila padre de pamilya.
Ginpakigbahin man sini nga padayon man ang mga ginapatigayon nga mga hearing sa mga suspetsado sa Maguindanao massacre.
Dugang pa sini, wala sang isa sa mga pamilya sang iban pa nga mediamen ang nagasungka sa ila pagpakigbato.
Ginhimo ni Jansen ang pahayag samtang gaindumdom ang handumanan sang iya amay kadungan sang Todos los Santos kahapon.
Madumdoman nga si Bombo Bart Maravilla ang anay chief of reporter sang Bombo Radyo Koronadal nga kalakip sa masobra 50 nga namatay sa makangilidlis nga masaker sang Nobyembre 23, 2009.
