Ginpabutyag sang isa ka tricycle driver sa syudad sang Koronadal nga kulang pa ang ginapatuman nga rollback sa presyo sang gatong.
Sa interview sang Bombo Radyo Koronadal kay Rey Rocacorba, isa ka tricycle driver, iya ginpahayag ni nga apisar may ginpatuman nga rollback, indi gihapon mahapos sa iya ang pagpamasada bangud dyutay lang ang ginpahamtang nga pagpanubo sa presyo sang gatong.
Suno kay Rocacorba, nga ginakabig niya nga sobra gihapon kataas ang presyo sang gatong, nga nagahatag sang dugang nga kabudlayan sa kasubong niya nga pamasada ang palangabuhian.
Ginpahayag pa niya nga apisar pa man nga nakabaton siya sang fuel subsidy halin sa gobyerno, kinahanglan gihapon siya magpadayon sa pagpamasada agud may mabulig siya sa pangabuhi sang iya pamilya.
Dugang pa ni Rocacorba, nga isa sa mga pinaka-daku nga problema nga ginaatubang nila subong amo ang kakulang sang pasahero bangud sa pagsulod sang madamo nga mga tricycle drivers sa syudad, nga nagadugang sa kompetensya kag nagapanubo sa ila kita.
Bangud sini, nagpanawagan si Rocacorba sa gobyerno nga kinahanglan pa sang mas maayo nga programa ukon assistance angot sa mga drivers nga naga-sakripisyo sa tunga sang mataas nga presyo sang gatong.
