KORONADAL CITY – Indi mangin apektado sang ginapatuman nga Martial law ang opisyal nga pagsugod sang Ramadan subong nga adlaw labi na sa Mindanao.
Ini ang ginpahayag ni Sultan Mutalib Sambuto, ang chief sang Muslim Affairs sang South Cotabato sa interbyu sang Bombo Radyo Koronadal.
Suno kay Sambuto, kasubong sang ginalauman sang mga Muslim sa tion nga positibo na ang moon sightings magasugod na nag ila ga pagpuasa.
Nahibaluan nga ang Ramadan ang isa ka bulan nga pagpuasa sang mga Muslim nga nagakatabo tagsa nga mag-abot ang ika-siyam nga bulan sa kalendaryo sang Islam, base sa Qur’an.
Ini ang panahon sang pag-fasting nga ginalikawan nag pagkain kag pag-inom sang tubig gikan sa pagsidlak sang adlaw tubtob sa pagtunod sini.
Nagatakop ang Ramadan sa Eid ul-Fitr ukon Hari Raya Puasa.
Ang pagpuasa ang ginahimo agud nga matudluan ang isa ka tawo nga magsakripisyo, magpakanubo kag mangin mahulaton.
Ini ang ginahimo man para kay Alah kag ang pagpangamuyo nga mas madamo kun ikumparar sa naanaran.
Ini ang panahon kun diin nagahingyo sang pasaylo para sa ila nga mga sala ang mga muslim,nagapangamuyo para sa ila nga kaluwasan kag para malayo ang malain nga espirito sa adlaw-adlaw sang ila pagpangabuh subong man malimpyuhan ang ila kaugalingon paagi sa disiplina kag pagbulig sa iban.
Sa subong, mangin kalakip sa ila pangamuyo ang mga Muslim nga apektado sang Marawi siege .
