KORONADAL CITY – Nangin generally peaceful ang una nga adlaw sang pagbalik eskwela sang tanan nga mga pampubliko nga eskwelahan sa siyudad sang Koronadal para sa School Year 2024-2025.
Ini ang assessment ni PLt. Col. Hoover Antonio, chief of police sang Koronadal City PNP sa interview sang Bombo Radyo Koronadal.
Suno kay Antonio, ang nakita lamang nila nga problema ang sa bahin sang trapiko bangud sa pagdagsa sang mga salakyan nga nagresulta sang pagkadelatar sang iban sa pagsulod sa klase ukon opisina.
Apang, sa kabug-usan nangin malinong kag matawhay ang pagbukas sang klase sa bug-os nga siyudad.
Aminado man si Antonio, nga antes pa man ang opening of classes nakahanda na ang “Oplan Balik Eskwela” contingency plan para masiguro ang kaluwasan sang tanan.
Ginpasiguro man sang opisyal nga magapadayon ang pagbantay sang kapulisan sa siyudad agud nga masiguro nga wala sang mga may matabo nga insidente sang kalakasan kag madamo nga iban pa.
