KORONADAL CITY- Nagpalapit sa waragwagan sang Bombo Radyo Koronadal ang iloy sang isa ka Overseas Filipino Worker sa Saudi Arabia makaligad suno pa nga madulaan sang husto nga paminsaron ang bata sini nga biktima sang pagpang-abuso sang mga amo.
Sa ekslusibo nga interbyu sang Bombo Radyo Koronadal kay Gng. Jessie Garcia, ginkilala ang bata sini nga si Melanie Garcia Baylosis, 34 anyos halin sa Maltana, Tampakan South Cotabato kag separar sa iya nga asawa kag may 3 ka mga kabataan.
Nahibaluan nga syam ka bulan pa lang ini sa Saudi Arabia sang maka-eksperyensya sang pagpang maltratar, pila ka bes nga ginpasa-pasahan sang mga employer kag ginbaligya, wala ginapakaon sang maayo nga nagresulta sa pagkadula sini sa husto nga paminsaron.
Dugang pa nga nabalitaan na lang nila ang natabo kay Melanie pinaagi man sa pila ka mga OFWs nga kakilala kag himata man nila kun sa diin ulihi nga nakit-an nila nga puno sang lagob si Melania.
Sa karun nagapangayo sang bulig ang pamilya sang Pinay Domestic Helper bangud kasamtangan nga yara sa Al Amal Mental Hospital na ang biktima kag wala man suno pa nagapakigbinuligay ang agency sini nga Placewell International nga nakabase sa syudad sang Tacurong.
Luyag man suno pa nila nga mabalik sa Pilipinas ang OFW kag mapasabat ang mga amo nga nagpang abuso sa biktima.
