KORONADAL CITY- Nagpanawagan sang bulig sa Bombo Radyo Koronadal ang isa ka Overseas Filipino Worker sa Riyadh, Saudi Arabia makaligad makapila ka bes suno pa ini nga ginlugos sang iya nga amo.
Sa interbyu sang Bombo Radyo Koronadal kay alyas Arianne halin sa South Cotabato, magduha ka tuig pa lang ini sa iya nga amo, ginamaltratar na ini kag ang pinakamalala pa ginhimuslan ini.
Suno kay Arrianne, una nga adlaw pa lang sini sa iya nga trabaho, nahibaluan na sini nga may malain nga intensyon ang iya nga amo nga ginkilala sa pangalan nga Ail Rashid Abdallah Alsaeid kun sa diin nagapanghurikap suno pa ini kag masami sya nga ginapilit sulod sa kwarto tubtob sa nagmadinalag-on ini sa iya malain nga plano.
Wala man sang ihibalo ang amo sini nga babayi bangud bulag ini.
Nagakahadlok man ini sa iya nga kabuhi bangud ginapaandaman na ini sang iya amo nga pagapatyon kun magapanugid apang wala ini sang mahimo kundi siugal ang iya nga kabuhi agud makapakagyo bangud wala man sang sabat ang local agency sini nga Keys Placement Agency kag ang counterpart sini sa Saudi nga Alangari Recruitment Agency.
