KORONADAL CITY – Liwat nga nagpanawagan ang New Peoples Army (NPA) na magpatuman ang gobyerno sang Suspension of Military kag Police Operation (SOMO) agud tigayon nga mahilway ang ila mga bihag nga mga pulis kag suldado.
Sandig sa report, napulo ka adlaw nga suspension of operation ang hingyo sang CPP-NPA-NDF kabaylo sang kaluwasan kag kahilwayan sang ila nga mga bihag partikular na sa mga lugar sang Bukidnon, Surigao del Norte, Agusan del Norte, Sultan Kudarat, Sarangani kag South Cotabato.
Madumduman nga apat pa ka mga suldado ang yara sa kamot sang NPA kun diin duha sa mga ini amo sanday Sgt. Solaiman Calucop kag PFC Samuel Garay nga lunsay gindakop sang mga rebelde sa Columbio, Sultan Kudarat sang tinalikdan nga Pebrero 2.
Ginpahayag naman ni Police Senior Insp. Bernard Francia, chief of police sang Colombio nga wala pa sila sang nabaton nga schedule angot sa paghilway sang duha ka mga suldado apang madugay na nga nagpaguwa sang mensahe ang mga rebelde.
