Ginpasiguro sang National Food Authority (NFA) nga may bastante nga buffer stock sang bugas sa tion nga may kalamidad sa tunga sang holiday season.
Ginhimo sang NFA ang pagpasiguro sini kasunod sang mga natala nga aktibidad sang bulkan Kanlaon nga nakaapekto sa mga residente malapit sa bulkan kag ang namonitor nga forecast sa intertropical convergence kag mga pag-ulan sa madako nga parte sang pungsod.
Suno kay NFA Administrator Larry Lacson, ginmanduan na nila ang ila mga empleyado nga yara sa field agud sa madasig ng a pag-activate sang Operation Centers sa mga lugar nga apektado sang baha, bagyo kag nagkalain-lain pa nga emergencies kag para buksan ang ila nga hotlines para sa madasig nga koordinasyon sa ila nga relief institutions.
Suno man sa NFA nga nakumpleto na ini sang 95% target para sa buffer stocking nga bugas sa karon nga tuig kung sa diin ang buffer stock sa karon yara sa 5.661 million bags nga katumbas sang milled rice.
