KORONADAL CITY- Nagapangasubo subong ang mga himata kag mga abyan sang isa ka Indian national nga ginluthang patay sang riding in tandem sa Prk. Namnama Brgy. San Emmanuel sa syudad sang Tacurong, Sultan Kudarat.
Sa interbyu sang Bombo Radyo Koronadal kay Rommil Singh utod sang ginpatay nga Indiano tuman ang ila kasubo makaligad mapatay ang utod sini nga si Harpreet Dhillon Singh, 27 anyos nga isa ka negosyante kag nagapautang sang kwarta.
Nahibaluan nga naghalin sa puluy-an si Singh sakay sang iya nga motorsiklo agud magpanukot sang mga may utang sa iya apang pag-abot sa barangay hall sang San Enmmanuel ginpaulanan ini sang bala sang 2 ka mga kalalakihan nga nakasakay sa motorsiklo.
Tatlo naman ka igo sang bala sa bahin sang iya ulo kag lawas ang nagtapos sa kabuhi sang biktima kun sa diin ginapatihan nga cal. 45 nga armas luthang ang gin-usar sa pagpatay sa biktima.
Sa inisyal nga imbestigasyon sang Tacurong City PNP may kaangtanan suno pa sa negosyo nga 5-6 ang nakit-an nga rason sa pagpatay sa nasambit nga Indian national.
Natalana naman nga ipauli ang bangkay sini sa India sa oras nga maproseso na ang mga nagakaigo nga mga dokumento.
Ginkondinar naman sang grupo sang mga Indiano nga mga negosyante ang brutal nga pagpatay sa ila kaupdanan.
