KORONADAL CITY- Punuanay sa karun ang sikat nga mga tourist destinations sa probinsya sang South Cotabato kadungan sang obserbasyon sang Semana Santa.
Nahibaluan nga bangud sa over crowded na ang mga beach resorts sa bahin sang General Santos City kag Sarangani province, mas ginpili sang iban nga mga turista nga magpadulong sa banwa sang Lake Sebu, South Cotabato kun sa diin makit-an ang kilala nga Seven Falls Zipline nga pinakamataas sa Southeast Asia.
Kaangot sini, sa banwa sang T’boli, South Cotabato ginadagsa man sang local kag foreign tourists ang Bakngeb cave kun sa diin nagapatigayon sang river rafting, mangin man ang Hidak falls kag hot springs nga makita sa Brgy. Lamhako kag Brgy. Kematu.
Samtang fully booked naman ang Majestic Lake Holon sang Brgy. Salacafe T’boli, South Cotabato kun sa diin madamo nga mga trekkers ang nagsugod na sa ila pagsaka sa nabukid nga bahin agud masaksihan ang kaanyag sini kag makapamalandong.
Kadungan sang Holy Week, ginpahayag ni T’boli South Cotabato Tourism Officer Rodel Hillado nga kasubong sang Station of the Cross sa nagkalain lain nga lugar may igapatigayon man nga Station of the Guardians sa tuktok sang Lake Holon mangin man ang bible sharing kag devotional mass.
