KORONADAL CITY- Arestado ang yara sa 15 katawo nga ginatudlo yara sa likod sang malapnagon nga pagpangawat sa Marawi City sa tunga sang nagaluntad nga kinagamo.
Nahibalyan nga una nga nadakpan sa akto ang napulo sa mga ini samtang nagapatigayon sang clearing operation ang hubon sang gobyerno sa pila ka bahin sang siyudad samtang 5 naman ang nadakpan sang Regional Public Safety Batallion sang PNP-ARMM sa checkpoint sa mismo nga war zone sa Brgy. Dansalan kun diin nakumpiskar sa mga ini ang ila nga mga ginkawat lakip na ang dako nga kantidad sang kwarta.
GInkilala ang 5 sa mga ini nga sanday Rommel Gementiza Serion, Jesus Ello, Arthur Francisco, Abdul Kabir Hadji Karim kag Salimar Tomawis nga residente man sang nasambit nga siyudad.
Samtang, emosyuna naman si Abdul Kabir Hadji Karim kag nagahinulsol sa iya ginhimo kun diin ginpahayag sini nga bangud sa tuman nga kagutom kag kapigaduhon ang nagtulod sa ila agud nga makasurvive sa natabo nga kinagamo.
Sa subong na-turn-over na sa tropa sang PNP-CIDG ang mga nadakpan nga kawatan.
Kun madumduman, pila ka katapu sang militar ang naglain ang buot bangud sa ginpasibangdan nga nagpangawat sa lugar kadungan sang ginpatigayon nga clearing operations.
