KORONADAL CITY – Tigayon na nga na-neutralized sang Government Forces ang isa ka bomber nga katapu sang Dawlah Islamiyah samtang arestado naman ang kaupod sini sa ginpatigayon nga focused military operation sa Purok 7, Brgy. Dunguan, M’lang, North Cotabato.
Ginkilala ang napatay nga si Monir Lintukan samtang naaresto naman ang kaupod sini nga si Randy Saro alias ‘Bobong’
Nadakpan ang mga ini sang gintingob-pwersa sang 90IB, 34IB, 1st Scout Ranger Battalion kag Police Regional Office – PRO12 kun diin nagluntad pa ang 30 minutos nga engkwentro.
Nahibalauan nga kaupod sang mga ini ang grupo ni Camen Sebod alias ‘Polok’ nga isa ka Dawlah Islamiyah member nga involbado sa extortion kag scam activities subong man si Omal Kamsa nga myembro sang BIFF-Karialan Faction. Bangud sa engkwentro, nagresulta ini sa pagkapatay ni Lintukan.
Si Lintukan kag mga kaupdanan sini ang ginatudlo nga responsable sa bombing incident sa Parang, Maguindanao; Mlang kag Aleosan sa North Cotabato kag ang twin bombing nga natabo diri sa siyudad sang Koronadal kag Tacurong sang damlag lang.
Suno pa kay Col. Oriel Pangcog, commander sang 601st Brigade Philipine Army, natumod ang grupo sang DI kag BIFF bangud sa kuha nga CCTV footage kag ang signature sang bomba nga nagsigabong.
Narecover naman sang mga suldado ang isa ka Cal 5.56mm M16 rifle, isa ka long magazine sa ng M16 nga may 41 rounds cartridge sang Cal 5.56mm ball kag isa ka bandolier subong man isa ka improvised explosive device.
