Mas istrikto nga monitoring sa mga resto bar kag iban pa nga establisyemento sa syudad ang ipatuman sang Koronadal City Police Station, ilabi na sa mga aktibidad nga posible may kaangtanan sa human trafficking.
Ini ang ginpasiguro ni PLtCol. Harold Cornel, Chief of Police sang Koronadal City PNP, sa interview sang Bombo Radyo Koronadal.
Suno kay Cornel, regular nga nagapatrolya kag nagalibot ang mga kapulisan sa mga resto bar, ilabi na kon gab-i, agud masiguro nga wala sang nagakatabo nga paglapas sa kasuguan kag para mapunggan ang pagbitbit ukon paggamit sang kontrabando, armas kag iban pa nga ilegal nga butang.
Apang bangud sa risgo sang human trafficking, ginpahayag sang opisyal nga palakason pa sang kapulisan ang monitoring kag pagpatigayon sang mga inspeksyon sa mga establisyemento.
Ginpahanumdum man ni Cornel ang mga business owner nga posible sila mag-atubang sang seryoso nga kaso kag mabug-at nga penalidad kun mapamatud-an nga may nagakatabo nga human trafficking sa sulod ukon may kaangtanan sa ila negosyo.
Gin-athag sang Koronadal City PNP nga kabahin ini sang ila tikang agud maproteheran ang mga biktima sang trafficking kag mapanabat ang mga indibidwal nga nagalapas sa kasuguan.
