Nagpahayag sang pagkakabalaka ang kampo ni anay House Speaker Ferdinand Martin Romualdez sa desisyon sang Sandiganbayan nga kakason si anay DPWH Secretary Manuel Bonoan sa kaso nga plunder may kaangtanan sa ginaalegar nga anomalya sa flood control projects.
Suno kay Atty. Ade Fajardo, legal counsel kag tigpamaba ni Romualdez, wala sang bisan sin-o nga DPWH engineer ukon opisyal nga nag-angot kay Romualdez sa iregularidad sa mga proyekto.
Wala man sang partikular nga proyekto nga ginatudlo kun diin naggamit sang impluwensiya si Romualdez para paboran ang isa ka contractor.
Bangud sini, ginakwestyon ni Fajardo kun ngaa mahimo na nga testigo si Bonoan matapos kakason bilang akusado.
Dugang pa niya, wala na sang “credible evidence” batok kay Romualdez matapos bawi-on sang lima ka “Maleta Boys,” lakip ang pangunahing testigo nga si Orly Guteza, ang ila mga alegasyon batok sa anay Speaker.
Suno pa kay Fajardo, ginasuportahan ini sang pahayag sang 25 ka iban nga testigo nga nagakuwestyon sa una nga mga alegasyon sang 18 “Maleta Boys.”
