KORONADAL CITY – Ginkakas sang Koronadal City Health Office ang kabalaka sang mga pumuluyo sa pagkaangkon sang local transmission.
Ini makaligad nagpositibo sa covid-19 virus ang isa ka seaman nga residente sang Brgy. Sta Cruz sini nga siyudad kag madamo pa ini sang ginkadtoan nga mga edipisyo kag mga nakasulapo.
Suno kay City Health Officer Dr. Edito Vego, may pila ka mga parameters ukon pagsulondan angot sa pagkaangkon sang local transmission, kasubong sang pagkalaton sang duha ukon mas madamo pa nga tawo sa virus halin sa carrier sini.
Apang ginpasiguro naman sang opisyal nga apesar positibo sa covid-19 ang nasambit nga pasyente, asymptomatic ini kag yara sa maayo nga kahimtangan.
Pamatuod suno pa diri ang paglakat-lakat sini samtang gina-monitor niya sa CCTV ang nasambit nga pasyente.
Kadungan sini, nagapanawagan man ang mga opisyal nga likawan nga magpalapta sang sala nga impormasyon nga magapadugang sa kahadlok sang mga residente kasunod sang natabo.
