Nagkasundo sa tigil-putukan ang Israel Defense Forces at ang grupong Hezbollah sa Lebanon nitong Biyernes, ayon sa isang opisyal ng United States Department of State, kasunod ng panibagong paglala ng labanan sa rehiyon.
Ayon sa opisyal na tumangging magpakilala, nagsimula ang ceasefire dakong alas-4:00 ng hapon sa Lebanon. Sinabi rin nito na naging mahalaga ang papel ng mga tagapamagitan mula sa Estados Unidos at Qatar, sa tulong din ng Iran, sa pagbuo ng kasunduan.
Bago ang kasunduan, muling sumiklab ang bakbakan na nagresulta sa pagkasawi ng 18 katao sa Lebanon dahil sa airstrike, habang apat na sundalong Israeli naman ang napatay sa opensiba ng Hezbollah, ayon sa mga ulat.
Kasunod ng tensyon, nakansela rin ang nakatakdang pag-uusap ng Estados Unidos at Iran sa Switzerland, na sana’y magtatalakay ng mas malawak na usaping pangkapayapaan at seguridad sa rehiyon, kabilang ang usapin sa mahahalagang ruta ng kalakalan gaya ng Strait of Hormuz.
Ayon sa mga ulat, sinabi ng isang mataas na opisyal ng Hezbollah na ipinaabot umano ng Iran na hindi maaaring ipagpatuloy ang negosasyon sa US kung walang komprehensibong tigil-putukan sa Lebanon.
Samantala, sinabi naman ng Iran na nananatili itong handang ipagtanggol ang interes nito at iginiit na may pananagutan ang Estados Unidos sa mga operasyon ng Israel sa Lebanon, kahit hindi nito direktang tinalakay ang nakanselang pag-uusap.
Sa kabila ng pag-asa sa ceasefire, nananatiling sensitibo ang sitwasyon sa Gitnang Silangan habang sinusubok ang katatagan ng bagong kasunduan sa pagitan ng mga pangunahing puwersa sa rehiyon.
