KORONADAL CITY- Nagapadayon sa subong ang imbestigasyon sang kapulisan sa nagluntad nga aksidente nga pagluthang-patay sa isa ka Indian national sang angkas sini samtang nagamaneho sang motorsiklo.
Ginkilala ang napatay nga si Dhaliwal Jaswinder, 28,single, isa ka negostante kag residente sang Brgy. Boragay Sudapin, Kidapawan City.
Sa interbyu sang Bombo Radyo Koronadal kay PCI John Rick Medel, hepe sang Makilala PNP naguwa sa ila imbestigasyon nga samtang ginausoy sang biktima kaupod ang angkas sini nga si Harpreet Singh ang dalanon sa bahin sang Prk 1 Singkatulan sa banwa sang Makilala hinali na lamang nga may naglupok sa wala mahibaluan nga direksyon kag naigo ang liog sang biktima.
Gindala pa sa hospital si Jaswinder apang ginbawian man sang kabuhi.
Kaangot sini, gilayon naman nga ginpaidalom sa paraffin test si Singh apang nag-negatibo ini.
Apang magapabilin sa gihapon nga person of interest si Singh sa pagpatay kay Jaswinder.
