Nag-angkon ang Houthi rebels sa Yemen nga sila ang responsable sa pag-atake sa duha ka Saudi oil tankers sa Red Sea, nga ginhingalanan nga Encelia kag Layla.
Bisan pa nag-angkon ang rebelde nga grupo sang pag-atake, wala pa ini sa subong napamatud-an sang mga independente nga otoridad.
Suno sa ila military spokesperson nga si Yahya Saree, gin-target ang duha ka barko gamit ang mga missile kag drone bangud ginlapas suno pa sang mga ini ang naval blockade nga ginpatuman sang Houthis batok sa mga Saudi commercial vessels.
Dugang pa ni Saree, padayon nga ipatuman sang Houthis ang ila naval operations kag ang ginatawag nila nga “siege for a siege equation” bilang kabahin sang ila kampanya sa rehiyon.
Samtang, gnkumpirmar sang Saudi Press Agency nga naigo ang oil tanker nga Encelia samtang nagabyahe sa Red Sea, nga nagresulta sa sunog sa unahan nga bahin sang barko.
Wala pa sang opisyal nga impormasyon sa kadakuon sang danyos sa Layla, apang ginpahayag sang mga otoridad nga luwas ang tanan nga tripulante kag wala sang may napilasan.
Bangud sang mga insidente, nagsaka ang kabalaka sa seguridad sang mga commercial vessel nga nagaagi sa Red Sea, samtang madamo nga oil tankers ang nagbag-o sang ila ruta ukon nagpundo anay agud malikawan ang Bab el-Mandeb Strait.
