Gwardiya sang Department of Labor and Employment 12 nasapwan nga patay

KORONADAL CITY – Tuman ang kakibot sang mga empleyado sang Department of Labor and Employment 12 sang masapwan nga wala na sang kabuhi ang ila sini nga gwardiya pasado alas-5 kagaina sang aga.

Ginkilala ang sekyu kay Lloyd Dumrique , 32-anyos, may asawa kag residente sang Lamba Banga, South Cotabato.

Suno sa impormasyon nga nadawat sang Bombo Radyo Koronadal, una nga nakakita sa bangkay amu ang ila sini nga utility worker nga si Noravil Cardinal nga ginkatingala sini nga sarado ang gate sang nasambit nga opisina kag didto nalang nakita nga wala na sang kabuhi si Dumrique.

Samtang ginalantaw nga anggulo sang mga otoridad ang rason sang kamatayon sang gwardiya amu ang bangungut ukon atake sa korason.