KORONADAL CITY- Ginpaidalum na sang South Cotabato PNP sa imbestigasyon ang isa ka motorista nga nakuhaan sang granada, cal. 45 kag mga bala sa ginpatigayon nga checkpoint sang Highway Patrol Group sang South Cotabato.
Sa ekslusibo nga interbyu sang Bombo Radyo kay SPO3 Silverio Abellera sang HPG South Cotabato, nabalabagan suno pa nila ang nasambit nga motorista sa Brgy. Morales syudad sang Koronadal nga si Datu Ali Kota, yara sa legal nga edad kag residente sang Brgy. Sampao Lutayan, Sultan Kudarat kun sa diin ginpangitaan nila ini sang mga dokumento apang wala sang mapakita.
Ginpamangkot man nila kun ano ang unod sang bag sini apang indi makasabat rason nga pilitanay nila ini nga ginbuksan kag nagkibot sa ila ang isa ka granada, isa ka cal. 45 nga armas kag mga bala.
Gilayon naman nga gin arestar si Kota kun sa diin sa karun ginpaidalom na sa imbestigasyon, dugang pa ni SPO3 Abellera nga ginahibalo pa kun ano ang motibo sang pagdala sini sang granada kag armas.
