Buo ang suporta kag pagkakaproud ang ginpahayag sang Koronadal City PNP kag sang Gobernador sang South Cotabato sa pag designar kay Police General Nicholas Torre III bilang bag-o nga Chief sang Philippine National Police.
Sa interbyu sang Bombo Radyo Koronadal kay Police LtCol. Peter Pinalgan Jr., ang hepe sang Koronadal City PNP, ginpahayag niya nga buo ang suporta sang ila hanay sa mga programa kag direktiba ni General Torre. Nagalaum siya nga may daku nga potensyal ang bag-o nga PNP chief nga mapaligon pa gid ang peace and order sa bilog nga pungsod, base sa iya maayo nga track record bilang lider sang pulisya.
Gindugang pa ni Pinalgan nga isa sa mga napamatud-an nga kadalag-an ni General Torre amo ang epektibo nga pagpapatuman sang quick police response system, nga isa man ka prayoridad sang Koronadal City PNP agud mapadasig ang pagresponde sa bisan ano nga insidente ukon reklamo sang mga pumuluyo.
Samtang, suno naman kay South Cotabato Governor Reynaldo S. Tamayo Jr. sa interbyu sang Bombo Radyo Koronadal, proud man siya sa pagkakatalaga kay General Torre, labi na nga taga Koronadal ini kag wala siya sang ginaduda sa integridad kag mga ginahimo sini.
Gindugang pa ni Governor Tamayo nga bisan may pila nga nagabatikos sa trabaho sang bag-o nga PNP chief, naipakita na ni Torre ang iya kaalaman, determinasyon, kag dedikasyon sa serbisyo bilang lider sang pambansang pulisya.
Nagalaum ang gobernador nga mas mapalig-on pa ang mga programa sang PNP sa idalom sang pamuno ni General Torre agud masiguro ang malinong kag luwas nga Pilipinas para sa tanan.
