Nagpalab-ot sang dako nga pagpasalamat si Fr. Stanley Dalagon Badon, CP, Parish Priest sang Holy Cross Parish sang Barangay Calumpang, General Santos City, sa Bombo Radyo Philippines kag Bombo Radyo Foundation, Inc. bangud sa bugas nga ila ginpadala para sa mga residente nga naapektuhan sang linog.
Sa interview sang Bombo Radyo, ginpahayag ni Fr. Badon nga ang donasyon nga bugas magabenepisyo sa kapin 2,000 ka indibidwal sa Brgy. Calumpang nga naapektuhan sang magnitude 7.8 nga pagtay-og nga nagluntad sa Southern Mindanao sang nagligad nga Lunes.
Suno sa iya, dako ang bulig sang nasambit nga ayuda sa mga pamilya nga nagakinahanglan sang suporta bangud sa epekto sang kalamidad.
Dugang pa niya, ang inisyatibo sang Bombo Radyo nagahatag sang bag-o nga paglaum kag kusog sa mga residente nga padayon nga nagabangon halin sa natabo nga linog.
Nagpasalamat man siya sa padayon nga pagpakita sang pagpakigbahin kag pagbulig sang Bombo Radyo sa komunidad ilabi na sa tion sang kalamidad kag emerhensiya.
